كتير اتكلموا عن الـNFT
و معظمهم مشرحش صح ولا عرف يوصل المعلومة
اشك اذا كان فهم المعلومة كاملة و ليه الNFT موجود و شغال
في البوست ده انا هحاول ابسطلكم المعلومات قدر الامكان و هنفهم اكتر العالم اللي فرض نفسه حوالينا و مبقيناش ملاحقين نعرف نمشي معاه
ركز معايا عشان الموضوع كبير و تفاصيله كتير و لكن لو قسمت النقط و قريت بتركيز ان شاء الله هتفهم كل حاجه،
أولا لو متعرفش العملات الرقمية زي البيتكوين و الايثيريوم هقولك نبذة عنهم عشان الـNFT مبني على الايثيريوم و مرتبط بيه
البيتكوين و الايثيريوم و غيرهم من العملات الرقمية هي عملات ملهاش وجود مادي في ارض الواقع لكن ليها وجود رقمي على الانترنت و ناس بتبيع و تشتري بيها و ليها بورصة و تداول و الاصل فيها انها محفوظة على اكتر من جهاز من غير ما تربط صاحب العملة برقم المحفظة، يعني لما بتشتري بيتكوين محفظتك ليها عنوان بيتحفظ عليه كمية البيتكوين دي و بتتسجل ف شبكة كبيرة ممكن توصل لملايين الاجهزة كل دول شاهدين على ان العملة دي بقت ف المحفظة دي و لكن بشرط ان محدش يعرف مين صاحب المحفظة دي و الفكرة دي معمولة اساسا للتملص من الرقابة الحكومية و البنكية و تتبع مسار الاموال
لكن معظم المحافظ دلوقتي بقت بتطلب توثيق هوية و بقت متعاونة مع الحكومات و البنوك و لكن لسه في محافظ سرية محدش يعرف عنها حاجه و منها حاجه اسمها المحفظة اللامركزية او محفظة web3 و دي ممكن تبقى سوفت وير و ممكن تبقى هاردوير يعني ممكن تجيب جهاز مخصوص تستخدمة كمحفظة و دي انت الرقيب الوحيد عليها و رغم انها اامن حاجه ضد الاختراق بتبقى بردو اصعب حاجه تقدر تحافظ عليها و تحافظ على طريقك للوصول ليها
مش هتكلم كتير عن تفاصيل المحافظ و العملات لكن دي نبذة بسيطة هتساعدك تفهم معنى الـNFT و ده الغرض الاساسي من البوست ده
الNFT هي اصول رقمية بمعنى انها محتوى رقمي ممكن يبقى صورة او فيديو او مقطع صوتي او حتى ملف مكتوب و اي حاجه تانية يمكن تواجدها رقميا على الانترنت لكن ده مجرد معنى الكلمة NFT
و هي اختصار لجملة Non Fungible Tokens
و ترجمتها الحرفية: أصول غير قابلة للاستبدال
يعني ايه غير قابله للاستبدال؟
يعني مش عملة زي الدولار و الجنيه و الايثيريوم و البيتكوين و مينفعش كل الnft يبقى سعرهم حاجه واحدة و لكن نقدر نشبهها بالقطعة الاثرية
يعني انت معاك قطعة اثرية مينفعش تساوي قطعة اثرية تانيه زي ما الجنيه بيساوي جنيه و الدولار بيساوي دولار
طب كلمة NFT دي مخبية ايه تاني؟
الNFT دي مبنية على شبكة الايثيريوم و معظم بيعها و شرائها بيتم بعملة الايثيريوم و بتعتبر اصول الNF عقود امتلاك و بيع و شراء ولا تعتبر عملات.
عشان تسجل الاصل بتاعك او الNFT اللي صممته على الشبكة بيبقى في رسوم معينة لكن بعدها شبكة الايثيريوم كلها بتبقى عارفة ان صاحب الحساب او المحفظة دي هو اللي مالك لأصل الNFT ده بعدها يقدر يبيعه لأي حد تاني مقابل اي سعر يحدده مع تفاصيل بيع متعددة زي انه ممكن يخليه اكتر من نسخة بسعر اقل او يخليه نسخة واحده بسعر اعلى
و تفصيله تانيه انه ممكن يبيعه بنسبة 95% او اقل يعني يفضل محتفظ ب5% او اكتر من الاصل
طب ازاي و ايه وجه الاستفادة
الاصل لما بيتباع بيبقى معروف مين مصممه او صاحبه الاصلي و مين صاحبه الحالي، سواء بقى المصمم او صاحب الاصل الحالي لو باعه مثلا بنسبة 75% ده معناه انه هيفضل مشارك المشتري بنسبة 25% يعني المشتري لو باع الاصل تاني فنسبة 25% من الارباح هتروح لصاحب الNFT الاصلي
امممم و ليه بقى اصلا ناس بتشتري NFT و الناس ازاي بتقدر تبيعه؟
في هنا تفصيلتين صغيرين هيفهموك السوق ماشي ازاي
اولا: ليه اللوح الفنية بتتباع؟ عشان في ناس بتحب الفن و تقدره
و ده السبب الاول ان الNFT بيتباع و بيشترى
ثانياً: في حاجات ممكن متبقاش من وجهة نظرك شكلها حلو و ممكن يبقى عندك حق ف ده بس ليه في ناس بتشتريها؟
الطريقة التانيه لبيع الNFT انك بتقدم معاه حاجه حصرية للي معاه الnft ده
مثلاً انا صممت 100 تصميم NFT و عرضتهم للبيع
و اعتبرت كل NFT منهم كارت دعوة لحفلة عندي او لكورس بقدمه مجانا للي اشترى مني الNFT
الطريقة دي و طرق كتير شبيهة ليها بيتباع بيها كميات رهيبة من الNFT و بأسعار فلكية، عشان في ناس عندها هواية
للحاجات دي
Justin Bieber و مجموعة اخرى من الفنانين و المشاهير اشترو NFT بملايين الدولارات عشان بس بيدي عضوية vip لحفلات خاصة بملاك الNFT دول!
و دي كانت قصة الNFT اتمنى الشرح يكون مبسط و تكون استوعبت معنى الNFT صح، ممكن الموضوع ميدخلش دماغك لكن ده امر واقع و منتشر و عايشين فيه.
و الـNFT ده بتاعي رابط المتجر اللي استخدمته ف أول تعليق
